فيفي عبدو امي المثالية !!!

كان من يومين حاصِل لِيّا
حادث غريب بس شوية
لقيت خبر منشور عالفيس
فيفي عبده أمي المثالية !!
وهات يا ندب وهات يا صويت
على كرامتِك يا بهية
والي يقولك كده ينفع ؟
يكرموا واحدة غازية !
والي يقولك آخر الظلم
صبحت بلدنا مولوخية
وهات يا فِتْي وهات ياجعير
على جايزة أمي المثالية
تقولهم مثالية إيه ؟؟؟
دا كله شُغل عاوطلية
حبة كباتن عاملين ايه
نادي حزين وابن هفية
وكل عام يتجمعوا فيه
يتشاركوا فيه حفلة شقية
قاموا كرموا في حفلتهم مين ؟
الحلوة فيفي اللّعَبية
علشان تكون شخصية عام
للنادي ابو كاب وطقية
ودي الحكاية وبس خلاص
بس المصيبة الفوجائية
لما البلد نشرت تكريم
أم الشهيد المثالية
ولا نطع من الي نشر عالفيس
نشرلها ولو مواسية
وكإننا ولسان حالنا
تجار فضيحة يافندية
وكإن زادنا وراسمالنا
نازلين في راسنا مطاطية
لأ كله كوم والجاية دي كوم
كله يقولك وطنية
ولو صدق اولاد الشوم
تبقى اسمها (واطَيَانية)